2026 жылғы 11 қыркүйекте Республикалық заң консультанттары алқасы Алматы қаласы Медеу аудандық сотының судьясы, медиация және коммуникациялар бойынша халықаралық сертификатталған тренер Куйкабаева Динара Бекеновнамен бірлесіп, «Алименттер: А-дан Я-ға дейін» тақырыбында оқыту вебинарын өткізді.

Вебинарға Қазақстанның барлық өңірлерінен екі жүзден астам заң консультанты қатысты.

Іс-шара барысында алименттерді өндіріп алудың өзекті мәселелері, оның ішінде сотқа жүгіну тәртібі, бұйрық арқылы және талап қою өндірістерінің ерекшеліктері, жалақыдан және өзге де кірістерден үлестік мөлшерде, сондай-ақ тұрақты ақша сомасында алимент өндіру мәселелері қаралды. Дәлелдемелерді ұсыну, сот практикасы және сот шешімдерін орындау мәселелеріне ерекше назар аударылды.

Спикер алименттік міндеттемелердің практикалық аспектілеріне, оның ішінде кәмелетке толмаған және кәмелетке толған балаларға алимент өндіруге, балаларды асырауға байланысты қосымша шығыстарға, берешекті айқындауға, бірнеше алименттік міндеттеме болған кезде туындайтын жағдайларға, сондай-ақ сот орындаушыларының шешімдерді орындау ерекшеліктеріне жан-жақты тоқталды. Дәріс барысында тараптардың жиі жіберетін қателері және алименттерді тиімді өндіріп алуға қатысты негізгі ұсынымдар да қарастырылды.

Қатысушылардың ерекше қызығушылығын сұрақ-жауап сессиясы тудырды. Заң консультанттары Қазақстан Республикасынан тыс жерде тұратын тұлғалардан алимент өндіру, борышкердің кірістерін айқындау, өткен кезеңдер үшін берешекті есептеу, алимент мөлшерін өзгерту, бірнеше сот актілерін орындау, кәмелетке толған балаларға алимент өндіру, жоғары оқу орнында білім алу, балалардың шетелге шығуы, сот орындаушыларының әрекеттері және құқық қолдану практикасындағы басқа да күрделі жағдайларға қатысты көптеген практикалық сұрақтар қойды.

Қатысушылардың сұрақтары кірістер мен мүлікті жасыру, жалған жұмысқа орналасу, алимент бойынша берешекті айқындау, сондай-ақ сот орындаушысының әрекеттерін өзгерту немесе оған шағым жасау мүмкіндігіне қатысты жағдайларды да қамтыды. Динара Бекеновна келіп түскен сұрақтарға жан-жақты жауап беріп, практикалық мысалдар келтірді.

Қатысушылар спикерге және Республикалық заң консультанттары алқасына мазмұнды әрі практикаға бағытталған вебинар ұйымдастырғаны және өзекті мәселелерді сот жүйесінің өкілімен тікелей талқылауға мүмкіндік бергені үшін алғыс білдірді.

Республикалық заң консультанттары алқасы заң консультанттарының біліктілігін арттыру, практикалық тәжірибе алмасу және кәсіби қоғамдастықты дамыту бағытындағы жүйелі жұмысын жалғастыруда.

Өткізілген оқыту іс-шаралары туралы ақпаратпен және вебинарлар жазбаларының мұрағатымен Алқаның ресми сайтынан танысуға болады: https://rcla.kz/kz/obuchenie